30.10.2019

“Uşaq hüquqlarının müdafiəsi” mövzusunda tədbir keçirilib

Oktyabrın 29-da Ombudsmanın Gəncə Regional Mərkəzi Daşkəsən Rayon İcra Hakimiyyəti ilə birgə “Uşaq hüquqlarının müdafiəsi” mövzusunda tədbir keçirib.

Daşkəsən şəhər İ. Nəsimi adına 1 nömrəli tam orta məktəbdə təşkil edilən tədbirdə  Daşkəsən Rayon İcra Hakimiyyətinin əməkdaşları, Ombudsmanın Gəncə Regional Mərkəzinin rəhbəri Səbuhi Abbasov, Rayon Təhsil Şöbəsinin müdir müavini Rizvan Ələsgərov, Rayon Polis Şöbəsinin inspektoru Ramiz Mazanov, Dini Qurumlarla İş üzrə Dövlət Komitəsinin Gəncə bölgəsi üzrə şöbəsinin baş məsləhətçisi Şamxal Həsənov, körpələr evi-uşaq bağçalarının müdirləri, məktəbin rəhbərliyi, müəllimlər və şagirdlər iştirak ediblər.

Tədbiri giriş nitqi ilə açan RİH-nin məsul əməkdaşı Elmar Əliyev möhtərəm Prezident cənab İlham Əliyevin 27 dekabr 2011-ci il tarixli Sərəncamı ilə təsdiq edilmiş “Azərbaycan Respublikasında İnsan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nda əhalinin müxtəlif qruplarının, o cümlədən də uşaq hüquqlarının müdafiəsi ilə bağlı təsbit olunan müddəaların uğurla həyata keçirildiyini vurğulayıb.

Ombudsmanın Gəncə Regional Mərkəzinin rəhbəri Səbuhi Abbasov çıxışında bildirib ki, hər il olduğu kimi bu il də Azərbaycan Respublikasının İnsan Hüquqları üzrə Müvəkkili Elmira Süleymanovanın təşəbbüsü ilə 20 oktyabr - 20 noyabr tarixlərində BMT-nin Uşaq Hüquqları Konvensiyasının qəbul edilməsinin ildönümü, 20 Noyabr – Ümumdünya Uşaqlar günü ərəfəsində uşaqlara diqqətin artırılması, uşaq hüquqlarının həyata keçirilməsi vəziyyətinin daha da yaxşılaşdırılması məqsədilə ölkədə “Uşaq hüquqları aylığı” elan edilib.

Digər çıxış edənlər də bildiriblər ki, Azərbaycan Respublikasının Prezidenti cənab İlham Əliyevin uşaq hüquqlarının müdafiəsi sahəsində atdığı addımlar, Azərbaycan Respublikasının Birinci vitse-prezidenti Mehriban xanım Əliyevanın uşaqlara göstərdiyi diqqət və qayğı Azərbaycan uşaqlarının taleyində əhəmiyyətli rol oynayacağına zəmanət verir. Qeyd edilib ki, Mehriban xanım Əliyevanın rəhbərlik etdiyi Heydər Əliyev Fondu nəcib missiyası ilə Azərbaycan uşaqlarının ən böyük dostuna, ən böyük himayədarına çevrilib.

Tədbir mövzu ətrafında maraqlı diskussiyalarla davam edib, şagirdlərin sualları ətraflı cavablandırılıb.

 


Açar sözlər: ,